Adiéu en tóuti,

Aquéli qu'an pas pouscu veni, an manca quaucarèn, de moun vejaire. Es estat un recampamen impourtant emai uno esperiènci unenco que la doubliren jamai. Gramaci au Damian que nous baiè uno bravo ajudo lou segoun jour ! Erian demié li quatre o cinc ourganisacioun de culturo nostro presènto sus lou causse : eitant vous dire qu'auren agu un brave aflat vers un publi grandaras.
La dificulta majo fuguè de pousqué circula entre nosto oustalarié à Loudevo e lou liò de la fèsto, mai urousamen, a nosto arribado, en avènt un estand, nous baièron uno autourisacioun de passage vers lou parcage dis ourganisatour dóu tèms qu'uno chavanasso refrescanto que-noun-sai petavo e bagnavo lou platèu. Pasmèns, lou proumié sèr, nous fauguè quàsi dos ouro de tèms pèr quita lou camp entendóumèns qu'en fàci uno panico di grèvo esperloungavo uno filo de veïculo enjusqu'à cinc kiloumètro avant la sourtido d'autourouto dóu Queilar !
L'endeman, fuguerian crespina en assajant lou passage pèr lou pounènt de l'Ouspitalet e en se capitant en uno ouro de tèms, sus plaço, en atravessant li parcage publi li mai proche de la manifestacioun. La segoundo grando dificulta fuguè la set e la calourasso que tustavo sènso relàmbi...

Avèn nousa de countat emé de mounde vengu d'en pertout : Euskadi, Kanaki, Catalunha, Quebec, Austrio e tóuti caire e cantoun di païs d'O e de Franço, pouliti, simple ciéutadan o mai oucitaniste eca... Aguerian tambèn forço bretoun e kabile atriva pèr li bandiero. La peticioun per lou double afichage en Alsaço marchè bèn ansin que la recordo de dardeno pèr li famiho di presounié pouliti bretoun (80€). Toucant li marcho pèr li liberta en Breizh e Prouvènço, forço persouno s'entresignèron mai claro èron li que prenguèron dato (avèn l'abitudo).
Faudra quicha que mai au rendès-vous que vèn, valènt à dire à l'universitat occitana d'estiu de Nime partènt dóu 25 d'avoust. Coume que siegue avèn testimounia de la presènci d'uno lengo, d'uno culturo duberto e d'un vam viéu au travès de Paratge e de sa filousoufìo pratico, ço que baiè la grato en uno pairo de pisso-vinaigre en cò dóu partit oucitan o de l'IEO Droumo mai que faguè grand gau en forço mounde agradivamen sousprés de nous descurbi e es acò que counto. Lou dissate, i'aguè un forum maneja dóu JP Belmon. Ailas, à l'acoustumado, se parlè d'aparamen de la lengo... en francés.

Tant qu'auren aquelo mènt e aquelo manco de courage, faren chi : encaro uno escasènço de mancado de moustra que se pòu tout dire en O e de faire clanti la lengo ! Prenguère la paraulo à la perfin pèr dire en prouvençau ço que n'en pensave : vaqui, à pau près la charradisso : " Auriéu, segur, un fube de causo de dire mai coume vèn de lou demanda lou Jan-Pèire, farai court e vous dirai lou mai impourtant, de moun vejaire : nous fau faire la revoulucioun ! Valènt à dire que fau parla i pichòt en O tre sa neissènço. Fau viéure en O, fai aima en O e fau faire de debat en O e siéu regretous que vuei, n'i'ague pas agu proun..." Urousamen que pèr la presènci de la lengo nostro, lou mounde jouine de radio lenga d'Òc, en fasènt uno animacioun naut-parladou rigourousamen bilingo baièron la toco e l'ambiènt que counvenien e noun sache que degun se n'en fuguèsse plagnegu ! Au moumèn de l'intervencioun dóu Jóusè Bové en direite à la TV, emai faguèron passa la bandiero plan planet davans li camera e, rèn qu'acò , faguè bèn mai pèr buta à la rodo, que tóuti li semblant forum de tóuti li que t'esplicon en franchiman que volon apara la lengo e que maucouron, à tout cop, lou mounde qu'aurien agu belèu l'envejo de s'interessa à-n-uno lengo vivo...

Amista,

Patric Colombo pèr Paratge Miramas de Prouvènço loucaramentrant02@hotmail.com http://loucaramentrant03.free.fr/

P.S. A lèu per l'acamp venènt dau Larzac ;-))